وينكي

محتاج أفهم شوية حاجات ... قولت أسال أصحابي .. يمكن نفهم كلنا مع بعض الحاجات اللي إحنا كلنا مش فهمنا ... ماحدش يستغرب طبيعة الأسئلة .. إحنا مش ها نسأل بأسلوبنا ... ها نفكر مع بعض يمكن نوصل لحاجة ..

وينكي .. لو كنت بتروح الساقية ممكن تسمعها بتغني هناك ... لو بتحب المدونات ممكن تقرأ مدوناتها .. حاجة كده بتعمل كل حاجة ... بتساعد ناس كتير .. بتحاول تعيش وتتعايش .. مش عارف هي صح ولا غلط ولا يهمني أعرف .. هي تجربة كده ... بس صوتها حلوة وإحساسها حلو ودماغها شغالة

وينكي : حاسة انك عندك وقت فراغ ؟؟

أحيانا بحس إني عندي وقت فراغ .. والإحساس ده بيقتلني ..غالبا بحسه لما مايكونش عندي حاجه مخططه لها أنى اعملها..أو مفيش حد حواليا أرغى معاه

نفهم من كده انك بتعملي كل ده علشان تهربي من إحساسك بالفراغ أو علشان تهربي من ضغوطك النفسية ؟؟

شوف الوقت بالنسبة لي نوعين ...وقت بعمل فيه حاجه... ووقت فاضي بدور فيه على حاجه اعملها...وكل ما قل وقت الفراغ في حياتي كل ما زادت فائدتى في الدنيا ..مش ها انكر أنى أحيانا بهرب من مشاكلي وبشغل نفسي عنها ..بس ده مش غالب في طبعي...وأحيانا وقت الفراغ بالنسبة لي بيكون مفيد جدا كوقت أنى أريح أعصابي شوية

أنتي مغنية ولا كاتبة ولا موظفة ولا فلكية .... أنتي ملخبطة ولا عبقرية ... حاسة انك بتعملي اللي أنتي عايزاه ..؟؟

أنا واحده لسه بتحاول تكتشف نفسها...لسه مالقيتش هدف حياتي.. وبدور عليه.. ماشيه في كل الطرق على التوازي عشان اكسب وقت ...عندي إحساس غامض إن العمر اقصر مما أتخيله ...بس قريب جدا ها استقر واعرف أنا إيه بالضبط

سعيدة ؟؟ حاسة انك لو كنتى في بلد تانية كنتي ها تكوني اسعد ؟؟؟؟

السعادة شيء نسبي.. ومرتبط باللحظة اللي أنت عايشها إذا كانت ترضيك ولا لأ...اقدر أقول أنى في الأغلب سعيدة ..ها اكون أسعد لو لفيت العالم بس ارجع مصر تانى.......
ما عندكش فكره أنا بحب البلد دي قد إيه ودي فكره دايما مسيطرة عليا..... وبقول لو جتلي فرصه إني أسافر بره... في أي بلد جميلة ونظيفة وفيها وظيفة مريحة واستقرار ومزايا مالهاش حصر.....في الأول ها ارحب جدا........لكن أنا واثقة أنى بعد اقل من شهر ها احن لمصر بكل ما فيها......

انتظروا الحلقة القادمة من قلم سنون

قلم / محمد التهامي