زي ما إحنا عارفين كلنا حكاية سي السيد وأمينة وأن الراجل زمان غير دلوقتي ودلوقتى إحنا في عالم المرأة أو في عالم ست السيد..!!
فزمان كانت الست بتاخد علي دماغها وكانت ملهاش رأي في الحياة ولا تأثير في المجتمع وان الأب والأخ والزوج هما اللي مسئولين عنها وأي رأي يقولوه كان بيتنفذ من غير نقاش..
وطبعا الست في الوقت ده مكنتش بتفكر مجرد التفكير إنها تعترض طبعا علشان لو اعترضت كانوا ممكن يقيموا عليها الحد.. كانوا يحكموا عليها بالإعدام شنقا..
إنما دلوقتي الحياة أتغيرت ومبقتش زي الأول وعلشان كده بنقول للمرأة متزعليش ولا تقهري نفسك يا حبيبتي يا للي كنتي مكسورة الجناح دلوقتي طلع لك ريش وأتحولتي من أمينة حاضر ونعم لست السيد الجبارة اللي ليها صوت ورأي وتأثير في المجتمع ودلوقتى ها نشوف أمينة زمان وأمينة دلوقتي..

أمينة زمان كان بيبدأ المشهد بسي السيد داخل البيت ينادي علي أمينة بصوت عالي وبيتلكك وعايز يتخانق ويقولها يلا بسرعة اخلعي لي الجزمة
ترد عليه أمينة وتقوله وهي خايفه وبتترعش عايز حاجه تاني يا سي السيد..؟؟
فيرد عليها ويقولها حضري لي العشا ثم يقعد يأكل وهي لا تأكل معاه وتأكل بعد ما يقوم ويخلص أكل..
يا عيني عليكى يا أمينة كنتي متعذبة..!!

تعالوا بقي شوفوا أمينة دلوقتي بقت ست السيد قد الدنيا والمشهد بيبدأ بسي السيد داخل من باب البيت تعبان جدا من الشغل ويقول لأمينة ممكن تحضري لي العشا علشان أنا تعبان وعايز أنام..؟؟
فترد عليه وتقول: أولاً أنا اسمي الست أمينة مش أمينة وبعدين حضر لنفسك أنا مش خدامه أهاليك..!!
وبعدين أنا أتعشيت أنا والعيال بعد ما جينا من النادي.. حضر لنفسك وما تعملش صوت علشان عايزه أنام..
وهي داخله قالها بصوت ضعيف..: روحي نامي نامت عليكى حيطه..
وسمعته وهو بيبرطم فقالت له وهي ترفع حاجب وتخفض آخر..
أنت بتقول حاجة..؟؟
فيقول لها أبدا يا حبيبتي أنا بقولك نوم الهنا..
فتقول له ونظرتها الحادة لم تفارقها بعد..: بحسب..!!
ولما دخلت تنام قالها وهو الدمعة ها تفر من عينه روحي نامي يا قويه يا مفترية..

ومن هنا المرأة خدت لقب ست السيد
بس تفتكروا المرأة عايزه تبقي ست السيد فعلاً..؟؟
ولو فعلا المرأة بقت ست السيد.. يا ترى الحياة ها تبقي شكلها إيه..؟؟
وهل فعلا موجود نموذج لست السيد دلوقتي في مجتمعنا..؟؟

وكل الأسئلة دي سألناها للمرأة بعد التهييييس والهزار ده كله..
وسألناها الأسئلة دي بجد..

ردت سيده بلسان كل السيدات وقالت المرأة عمرها ما أتمنت تبقي ست السيد كل اللي المرأة عايزاه وبتتمناه إن يبقي ليها دور وتأثير في المجتمع وقالت إحنا مش عايزين يبقي فيه وجود لسي السيد ولا ست السيد في مجتمعنا..

إحنا بنطالب بوجود احترام متبادل بين الطرفين لآن كل واحد ليه دور ودورهم لا يقل أهميه عن بعض بس مش معني كده إني بقول أن مفيش وجود لست السيد في مجتمعنا أكيد هنلاقي نماذج لست السيد ولسي السيد برضه..
علشان كده أنا بقول لسي السيد وست السيد الطيب أحسن..

قلم / هاجر حمدي