أكيد طبعا كلنا أتفرجنا على الأفلام العربي القديمة وأكيد مفيش حد ما شافش أفلام عربي قديمة
فيه حاجة بقى أنا لاحظتها في معظم الأفلام العربي القديمة الأبيض والأسود وهى قصص الحب اللي بتكون موجودة في الفيلم بصراحة بحس أنها قصص ساذجة جدا ومفيهاش حب أصلا
من كام يوم كنت بتفرج على التليفزيون وعمالة أقلب لحد ما وصلت لقناه عليها فيلم أبيض وأسود قلت أتفرج شوية
المهم وأنا بتفرج على قصة الحب الرائعة زى ما بيحاولوا يقنعونا لاحظت كمية سذاجة وقلة عقل عند البنت اللي غالبا بيكون الولد ما بيحبهاش ولكنه عايز يتسلى وشاف أنه أقرب طريق ليها الضحك عليها بكلام الحب ووهمها بأنه بيحبها لحد ما يوصل لغرضه وبعد كده يرميها..
بصراحة مش عارفة ليه حسيت أن أفلام الأبيض والأسود كل قصص الحب اللي فيها ساذجة لدرجة كبيرة جداً والبطل اللي المفروض أنه بيحب البطلة عمال يصطنع الرومانسية والحب وهو باين عليه أصلا أنه بيتسلى بيها مش أكتر ومش عارفة أزاي البنت اللي بيعمل معاها كده مابتاخدش بالها من طريقة كلامه اللي باين منها أنه عايز يتسلى وبس وكلامه وأفعاله كلها مصطنعة لغرض في رأسه أنه يوصل لها وبعد كده يبان على حقيقته
أعتقد أن أقل بنت في مستوى التفكير وفى خبرات الحياة ها تقدر تفرق بين الولد اللي بيضحك عليها واللي بيحبها بجد
أزاي بس كمية السذاجة اللي كانوا بيحبوا فيها البنت مش قادرة أصدق..!
طيب نروح لنقطة تانية وهي أنه ساعات بيكون البطل بيحب البطلة بجد مش عايز يتسلى أو يمشى معاها يومين وخلاص ولكن الحب في الأفلام القديمة كلها كان عند الولد هو العلاقة بينه وبين البنت بمعنى أنه ماكانش بيفكر متى سيرتبط بها ولا ها يعمل إيه علشان يتقدم لها ولكن كل تفكيره محصور في أنه بيحاول يجذب البنت اللي بيحبها واللي هي بتحبه لحدوث علاقة بينهم وكانوا فعلا بيصوروا أن الحب ما هو إلا علاقة بين أتنين وبس..
وطبعا كنا بنشوف أن البطل بعد ما بياخد غرضه من البنت بيعمل حاجة من أتنين يا أما يحاول يسرع بالارتباط بيها علشان يستر عليها قبل ما الفضيحة تبان أو يطلع ندل ويسيبها ونشوف باقي القصة الساذجة من ذهاب البنت للشغل في أحد الكباريهات أو الشقق المشبوهة وفى النهاية يراها البطل اللي كان بيحبها وضحك عليها وتصعب عليه ويحس أنه السبب في اللي حصل لها ويتجوزها
يا سلام منتهى الوفاء والحب..!!
أزاي كانوا بيصوروا البنات بالسذاجة دي.. ده بجد في وجهه نظري تقليل كبير من البنات وكمان ليه كانت صورة الحب في عقل كل شاب في الأفلام دي مبنية على أنه عايز يعمل معاها علاقة سواء كان ناوى يتجوزها ولا..لأ..!!
وفعلا تصور الشاب للحب على أنه علاقة بين راجل وست تقليل من قيمة الحب والعلاقات الراقية اللي المفروض تكون بين الناس
وبغض النظر عن رأيي في موضوع أنه بنت وولد يعرفوا بعض تحت مسمى الحب ويمشوا مع بعض لحد ما يرتبطوا أو لا أعتقد أن الحب مش كده
الحب مش مجرد علاقة بين راجل وست وما ينفعش نصوره على أنه مجرد علاقة بين أي أتنين..
الحب ترابط روحين ببعض وتوافق بين أتنين وتقبل كل طرف لمميزات وعيوب التانى..
الحب توافق بين شخصيتين في كل شيء تقبل كل منهم لطبيعة فكر وشخصية التانى..
الحب أكبر من كده بكتير ومش ها أقدر أفسر كل معاني الحب لأني لو فضلت أقول الحب هو إيه مش ها يكفيني مليون موضوع
ولكن الحب مش مجرد علاقة بين أتنين ويعملوها في الخفاء وكل واحد يروح لحاله..!!
الحب أكبر وأعمق من كده بكتير..
وكفاية سذاجة لحد كده لأننا خلاص تعبنا وأكيد هلاقي حد يقوللي ما هي الأفلام الجديدة برضه بتجيب البنت ممكن يضحك عليها بكل سهولة وبتجيب الولد كل تفكيره في أنه يعمل علاقة مع البنت
ها أرد وأقول أن أفلام دلوقتي بتجيب البنت ناصحة ومصححة وواعية لكل اللي بيحصل حواليا وهي اللي بتوصل نفسها للغلط ولكن أفلام زمان كانت بتجيب البنت ساذجة جدا وممكن يضحك عليها بكلمتين وتبقى عاملة زى اللي متبنجه ومسحوبة مش عارفة رايحه فين والبطل يسقيها حاجة أصفرة وما بتفوقش إلا بعد المصيبة..!!!!

قلم / بسمه عبد الباسط