قلم / بسمة بهاء

بالأمس كنت أتحدث مع ابن عمى الذي كان في زيارة لمنزلنا وهو شاب يدرس بالأزهر الشريف وهو من هؤلاء الناس الذين يحافظون على ترك اللحية وارتداء الجلباب القصير والطاقية التي توحي بأن من أمامك هو شيخ مخضرم ويرى أن ذلك هو التدين..!!

كان حديثه معي حول إباحة تعدد الزوجات في الإسلام وكان مُصّر أن يقنعني أن تعدد الزوجات هذا هو شيء نبيل وأن الذي يفعل هذا يأخذ ثواب عظيم..!!
الكارثة بقى أنه لسه خاطب منذ فترة قصيرة ومع هذا يفكر أن يتزوج على خطيبته وهو لسه ما اتجوزهاش أصلاً..!!

المهم ظل يروي لي أحاديث وآيات قرآنية تثبت وتؤكد صحة كلامه ومع هذا كنت أري فيها وأنا أستمع له أن تعدد الزوجات برضه مش مستحب.. يعنى لما ربنا يقول (( وإن خفتم ألا تعدلوا فواحدة )).. ثم يقول في موضوع آخر (( ولن تستطيعوا أن تعدلوا وإن حرصتم )) يبقى إيه..؟؟
وأعتقد إن مفيش دين سماوي واحد بيحلل انك تأذى حد في مشاعره..
وحقيقي أنا مش قادرة افهم هما بيفكروا في البنات بالشكل ده أزاي.. فالرسول (صلي الله عليه وسلم) وصى عليهم وقال (( رفقا بالقوارير ))..
وكيف يفكرون في التعامل مع النساء على أنهم جواري أو بهائم كده كأنهم خلقن ليقضوا وطرهم فيهم..؟
ولو فكرتم في أي حاجة محرمة في الدين هتلاقوا إن ربنا محرمها لسبب والسبب لن ينحسر عن أنها شيء يؤدى إلي ضرر سواء لـ اللي بيعملها أو غيره ..
وأنا بالتالي مش قادرة افهم أزاي اكتر ناس المفروض أنهم فاهمين الدين كويس وقارئين فيه بشكل جيد يحللوا أذية المشاعر بالطريقة دي.. وكمان يحثوا عليها كأن تركها ذنب فبجد دي حاجه تضايق قوى وتحير في نفس الوقت.. وتشكك في مصداقية هؤلاء الناس الذين هم من المفروض أنهم أعلم منا..!!

ويمكن أصدق إن تعدد الزوجات حلال في حالة إن الزوجة تكون عاقر أو نكدية مثلاً ومنكدة علي الراجل عيشته وعلى طول خناق.. لكن لما تكون واحدة شايله جوزها في عنيها يروح يتجوز عليها ليه ويعمل حجته إن اللي أتجوزها قال إيه أرمله محتاجه راجل وحرام تتساب لوحدها فيقولك أما ادخل بيها الجنة..!!!!!

لو عايزين الجنة صحيح..
روح يا خويا اعمل صدقه جاريه ها تدخلك الجنة برضه..!!
اكفل يتيم وها تدخل الجنة وها تبقى مع الرسول (صلى الله عليه وسلم) كمان..
إما انك تتجوز على مراتك فدي فراغة عين ليس أكثر..!!

ومن العجب العجاب أيضا أن أحد أقربائي راجل كبير في السن تحس لما تشوفه بالطيبة والوقار.. وكان شعره ابيض كله بس تحس لما تشوفه انه شباب رغم كبر سنه.. وكنت بحبه قوى وشايفاه قدوة ليا .. ومنذ فترة توفاه الله – الله يرحمه – وبينما هم يوزعون تركته اكتشفوا أنه كان متزوج على مراته ولكم أن تتخيلوا وقع الصدمة على زوجته التي تصورت انه عاش عمره كله مخلص لها.. وحقيقي أنا مش عارفه قدرت تترحم عليه أزاي بعد ما اكتشفت خيانته ليها..
ووالله الست بجد كانت حاطاه في عنيها ومربية أولاده أحسن تربيه.. ثم تكتشف في النهاية انه خدعها وتزوج سراً دون أن يعلم أحد.. واعتقد أنه لو كان يفعل فعل لن يلام عليه لأعلن ذلك بوضوح ولما جعله سر..!!
وإلا لماذا اخفي سره ولم يفتضح إلا عند موته..
حقيقي مش قادرة افهم ليه الخيانة المحللة دي.. وهل ممكن دينا يأمرنا بكده فعلاً..!!
أنا أشك ومش مصدقة ولا أعتقد أن أي دين ممكن يحلل أو يصرح بهذه الخيانة..
وهذا الجرح الغائر للمشاعر..
ومش عارفه أقول أكثر من كده إيه..
خلص الكلام..
وكل عيد حب وأنتم طيبين..

التسميات: مقالات