الخميس، 5 مارس 2009
هي دي مصر اللي أنا معرفهاش - مقال


مرغم عليك يا صبح مغصوب يا ليل

لا دخلتها برجليا ولا كانلي ميل

شايلني شيل دخلت أنا في الحياة

وبكره ح أخرج منها شايلني شيل

وعجبي !!


بصيت عليها من فوق لقتها جميله عجيبة , ومش بس كده غريبة بسيطة معقده, فاضيه بس مليانه كرهوها ولهم حق وفي الأخر حبوها ولهم ألف حق ......

كبرت شوية ما أنا مش ها افضل طول عمري صغير يــــــــاه رغم إن اسمي "الصغير" المهم بصيت عليها من تاني معرفتهاش ..وها تسأل ليه ؟؟

ها اقولك روح يا شاطر والعب بعيد ده أنت شكلك بليد , سيرك كبير مليان بني أدمين تجري وتلعب تنبش تنهب , ومن جواه سيرك صغير قليل اللي يعرف صاحبه مين؟؟..بس اللي يغيظك إن هنا وهناك ماحدش عارف مين بيلعب إيه وعلي مين..؟؟

كلها ماسكات بنتدارى جواها منها الملون ومنها السادة , بنبص علي بعضنا من ورا ستاره زي الحرامية وبنبرر الغلط ونقول عليه أكبر صح عالم تخونك بقانون موحد "أن الحرام أكبر حلال وبدون جدال"
تلعب شقلبظات في الهوا وكأنك ريشه ترسم بخطوطها أجمل قوس قزح كل العيون ملهوفة عليك خايفة تقع تتكسر , وأنت خايف تطلع لفوق في الهوا وتتشعلق في حلمك وفجأة الحلم نفسه يكسرك....

فجاه أقرب مالك يطعنك ..طب وإيه الجديد ؟؟ ويوم ما تعيد الشريط من تاني تكتشف إنك أول المجانين تسأل نفسك السؤال الملغي من قاموس البني أدمين ليه وعشان إيه؟؟, وترد علي نفسك من تاني ...دي عالم مفيش في قلوبها رحمه عالم حاقدة وجاحده لا تعرف تغفر ولا تسامح تقتل وبس وأسهل حاجه عندها الانتقام ..


وتبدأ تتفرج علي فقرات السيرك واحدة ورا التانية ..وفي كل مره تسقف وتصفر كمان لغاية ما دخل الراجل الهمام صاحب الموهبة راكب الفرس وشادد اللجام.. "البلياتشو " صاحب الوش الملون مبتسم علي طول رغم إن عيونه غرقانه دموع يضّحك كل اللي حواليه وهو محتاج اللي يخفف عنه هموم الكون بحاله عمرك شوفت أغرب من كده إن اللي بيرسم البسمة علي شفايفك محتاج يتعلم أزاي يضحك...
يضحك صحيح لكن يوم ما تقسي عليه بيبقى في شدته وقسوته اقوي أشرس من الوحوش.. في أزمته ساب الكون بحاله وساب حضن البني أدمين وراح لحضن الوحوش بصلهم وابتسم وكأنه بيلاعب طفل رضيع ...خاف منه ده من خاف ساعات سلم...

ويعمل إيه يوم ما يلاقي نفسه متهم بتهمه معملهاش يقول مظلوم ويردوا ويقولوا : عيب يا راجل خليك شجاع خلصنا وأعترف....
ويشتد اللوم ويردوا عليه وعيونه باصه للأرض تشكي وتحكي عن حاجات كتير جواه : ليه يا صغير سبت السيرك الصغير اللي تفهم فيه اللي كنت بتطير وتضرب شقلبظات جواه وتدخل سيرك اكبر منك وصعب عليك لا تفهم فيه ولا يساعدك يا صغير ده صعب عليك واديك شايف طب شيل بقي بلاويك , وهو مصر الحق معاه صاحب موقف مش بس كده ده قالها كمان " أنا فاهم " وصاحب السيرك هو اللي مش فاهم ......

هي دي مصـــــــــــــــــــــر اللي ناسها عارفين ..أو يمكن حاسين يا عم مش إحنا بس اللي عارفين الحقيقة ...هي دي مصـــــــــــــر اللي فيها سور فاصل بين العايشين والميتين .......

هي دي مصـــــــــــــــــــــر اللي أنا معرفهاش

قلم / ناهد سمير

التسميات: