دوما عندما يحل علينا شهر رمضان الكريم نرى في مصرنا الحبية العجب العجاب..
فنرى من كان يهمل المصحف طوال العام وقد صار ينكفئ على المصحف قرابة الـ 24 ساعة يومياً ولا يتركه أبدا ومن لم يكن حريص على الصلاة صار يحرص على الصلاة بانتظام ويحافظ حتى على السنن والتراويح... والتي لم تكن محجبة نراها تتحجب والشاب اللي كان دايما بيعاكس بنات بيبطل يعاكس البنات.. واللي كانت بتلبس ضيق وملابس مثيرة تقول مش ها البس ضيق عشان رمضان.. واللي كانت بتحط مكياج بتبطل عشان رمضان..
وطبعا من الجميل أن نزيد من طاعتنا في شهر رمضان لكن أن ننسى الله طوال السنة ونتذكره في شهر رمضان فقط فهذا هو الأمر الغريب.. أليس رب رمضان هو رب السنة كلها والسؤال الآن ... اللي افتكر المصحف في رمضان ودلوقتى على طول المصحف في أيده ليه مش بيفتحه طول السنة..؟؟
وليه تلاقى الشاب اللي بيلبس مثلا سلسلة يقول مش ها البس سلسلة وأنا في رمضان..؟؟
والأعجب لما نلاقى ناس بتمسع أغاني كتير وتيجي في رمضان يقولوا مش ها نسمع أغاني رغم إنها لو حرام تبقى حرام طول السنة ولو حلال برضه تبقى حلال طول السنة..
حتى علاقة البنات مع الشباب بتتغير في رمضان فتجد المرتبطين عاطفيا بشكل مش رسمي يقولوا بلاش نتقابل في رمضان.. طيب هو يعنى ربنا كان مسافر (حاشا لله) طول السنة ورجع في رمضان..
وطبعا نبص نلاقى المساجد اللي كانت دايما بالعافية فيها صف أو أتنين دلوقتى مفيهاش مكان لرجل... طبعا أنا مش ضد ده .. ولا زعلان من التحسن للأفضل بس مش معقول نتغير بالشكل الحلو ده في رمضان ونرجع بعد رمضان ولا كأننا كنا ملتزمين.. وطائعين..

يعني إحنا في شهر رمضان بيتحول مجتمعنا تقريباً لمدينة فاضلة ..
البنات محتشمات والشباب محترمين
وغالبا هتلاقي محدش بيسرق ولا بينصب
المساجد ممتلئة والقران يقرأ طول الوقت
وغالبا محدش بيشاكل حد إلا شديدي العصبية
وكلمة الله يسامحك تلاقيها تبقى على كل لسان

طيب ليه بنبقى مخلوقات تانية في رمضان وغيره لأ..؟؟
ليه اللي بيصلى الفجر حاضر في رمضان مش بيصلى خالص بعدها أو على الأقل ما بيدخلش المساجد تاني..؟؟
وليه اللى مش محجبة تبقى مثال للاحتشام في رمضان
طيب هو أنى وجه من دول هو وجهنا الحقيقي فعلا
الوجه الحلو في رمضان
ولا الوجه السيئ اللي في غير رمضان
يا ترى إحنا اللى بيصلى حاضر كل الصلوات وبيقرأ القرآن على طول ومش بيعاكس ولا بنت ولا بيتكلم وحش مع حد زى ما بنعمل في رمضان...

ولا إحنا اللي بيصلى على ما تفرج ومش بيسيب واحدة معدية إلا ويعاكسها وبينم طول الليل والنهار...
إحنا ده ولا ده..؟؟
ولو كنا واحد فيهم..
أزاى شخصيتنا بتجمع المتناقضات دي في جسم واحد..؟؟
أزاى اللى بيجرى عشان الفجر في رمضان ولو لقي الجامع زحمة بيصليه في الشارع
هو هو اللي مش بيصلى بانتظام في غير رمضان..؟؟

أزاي البنت اللى بتكون مش محجبة وبتحط مكياح عمال على بطال بشكل منفر
بتبقى في رمضان ملتزمة جدا وممكن تلبس إسدال كمان..؟؟
طب منين ده ومنين ده..؟؟
وليه هذه الازدواجية..؟؟

وها يفضل السؤال قائم
وأنا عن نفسي مش لاقي له إجابة
وبرضه ها تفضل مصرنا في رمضان نقول عليها
اللي يعيش ياما يشوف

قلم / أحمد ........